CEBU CITY– Nanghinaot si Barangay Sambag 2 Kapitan Ryan Aznar nga mapaspasan na ang pagrelease sa resulta sa swab test.
Kini subay na sa plano nga karong semanaha sugdan na sa Inter Agency Task Force (IATF), Cebu ang ‘full blast house to house contact tracing’ inubanan sa kapulisan.
Matud ni Aznar sa dihang nahinabi sa Bombo Radyo Cebu sa tulumanong Bombo Barangayan nga usa sa labing problema ilabina sa Barangay Sambag 2 mao ang pagawas sa resulta sa swab test nga hilabiha’ng ka dugay.
Gani, sigon pa sa kapitan nga wala pa ang IATF naabot niining puntuha, nagpahigayon na sila og contact tracing apan ang problema lang niini dugay kaayo mugawas ang resulta sama nalang sa ilang gi-swab test niadtong Hulyo 12 nga hangtud karon wala pa miabot ang resulta.
Boot sa kapitan nga kung subsub na ang pagpahigayon sa contact tracing, kinahanglan nga usa (1) ngadto sa duha (2) ka adlaw mugawas na ang resulta og madawat na nila dayon para dali ra usab kaayo alang kanila ang sunod nga lakang nga pagabuhaton.
