PROVINCE OF CEBU-Napalgang wala nay kinabuhi ang duha ka menor de edad, nga nawala samtang naglangoy sa dagat, kinsa nga naglutaw sa kadagatan sa baybayon sa Panadtaran sa lungsod sa San Fernando, habagatang Sugbo sayo sa buntag Biyernes, Hulyo 14,2023.
Giila sa kapolisan ang mga biktima nga sila si Jozel Apao, 13, ug Frances Ramayrat, 16, pulos taga Barangay Tungo sa San Fernando.
Ang mga bata gikataho nga nawala niadtong Huwebes, Hulyo 13, Pipila ka oras human sa ilang pagkawala, ang mga lawas sa duha giluwas duol sa dapit diin sila nawala.
Gitino ni Rommel Pinatil, hepe sa San Fernando Municipal Disaster Risk Reduction and Management Office (MDRRMO), nga nadawat nila ang taho bahin sa pagkalumos mga alas 11 sa buntag gikan sa usa ka concern citizen.
Hinungdan nga ang mga personahe sa MDRRMO daling niresponde sa tawag ug gisugdan ang search and rescue operation.
Dugang pa, nga atol sa ilang search and rescue operation kusog ang mga balod ug zero visibility hinungdan nga naglisod sa pagpangita.
Apan ang mga personahe, inabagan sa pipila ka mananagat, ug mga personahe sa lokal nga Bureau of Fire Protection, nagpadayun sa pagpangita.
Dugang pa, nga adunay mga sakop sa Coast Guard nga nihatag usab og hinabang.
Matod ni Pinatil nga ilang gipangita ang mga menor de edad hangtod mga alas 6:30 sa gabii, apan kinahanglang mohunong sila tungod sa kusog nga mga balod ug sa kusog nga ulan.
Ang search and retrieval operation gipahigayon sayo niadtong Huwebes sa buntag mga alas 5:00 sa buntag.
Matud ni Pinatil nga nagtuo ang maong mananagat nga adunay delikado nga sulog sa maong lugar.
Nasayran, nga daghang mga biktima ang nangalumos sa maong dapit kaniadto ug ang maong lugar giisip nga delikado sa mga residente tungod niini.
