Nagtingkagol karon sa Abellana Police Station ang usa ka 41-anyos nga food delivery rider human nga nagpakita sa iyang pribadong parte sa lawas ngadto sa usa ka 14-anyos nga batang babaye sa Brgy. Sambag 1, Dakbayan sa Sugbo.
Base sa inisyal nga impormasyon, nipalit ra unta sa tindahan ang mao nga akusado nga si alyas “Mark” sa diha nga gipakitaan sa kinataw ang 14-anyos nga babayeng tigbantay sa tindahan nga iyang gipalitan.
Busa, daling nisumbong ang mao nga menor de edad sa iyang amahan nga usa ka pulis nga maoy nidala sa suspetsado sa Abellana Police Station.
Sa pakighinabi sa Bombo Cebu News Team ngadto kang “Mark”, iyahang gi-angkon nga wala niya matuyo nga napakita niya ang iyang kinataw ngadto sa menor de edad, ug dili niya intensyon nga mabastos niya ang mao nga bata, ug naasoy usab niya nga dili siya hubog atong higayona.
Sa binuhatan sa akusado, nanawagan siya sa pamilya sa biktima nga unta iyahang maka-atubang ang amahan nga pulis ug ang biktima, para personal niya nga mapadangat ang iya pagpasaylo. | via Bombo Irene Ardiente
