CEBU CITY-‘Fake News’ lamang ang mikatap sa social media niadtong Dominggo, Pebrero 2, 2020 sa hapon kung diin matud pa naay mga Chinese Nationals nga wala pasudla sa usa ka hotel dinhi sa dakbayan sa Sugbo ug natanggong nalang sa Fuente Circle.
Kini ang gitino ni Konsehal Dave Tumulak ang chairman sa Committe on Public Order and Safety sa dihang mahinabi sa Bombo Radyo Cebu.
Giklaro ni Tumulak nga nagpahuway lamang ang maong mga langyaw sa Fuente Circle samtang naghuwat og bus padung sa airport.Nakamugna kini og ratol ug kahadlok sa katawhan human nga gikuhaan kini sila og hulagway og gipost dayon sa social media ug sayop ang impormasyon nga gipakatap.
Hinungdan nga nanawagan si Tumulak sa mga tao nga kusog mugamit sa social media nga mahimong ‘responsable’ sa ipang post niini ug sa ipang share nga dili makamugna og kahadlok.
Makasagmuyo matud pa huna-hunaon nga mag-inunayay ang mga Sugbuanon sa pagpakatap og kahadlok. Inay mas maayo nga mutabang lamang og pakatap og mga positibo ug makatabang nga impormasyon.
