CEBU CITY-Pito (7) sa napulo (10) ka mga private hospital sa Central Visayas ang andam nga mo-expand sa ilahang kapasidad alang sa pagdawat ug mga COVID-19 patients.
Gibutyag ni Dr. Mary Jean Loreche, ang tigpamaba sa DOH Region 7, sa dihang nahinabi sa Bombo Radyo Cebu sa tulumanong Bombohanay Bigtime nga sa pagkakarun aduna pa may lugar alang sa COVID-19 nga mga pasyente apan giingong lapas na kini sa 50% diin gitawag na niini nga usa ka ‘red flag’.
Subay niini, mihangyo ang naasoy nga tigpamaba ngadto sa mga mild cases nga mubalhin lang una sa mga isolation facility arun nga magamit ang mga tambalanan alang niadtong mga moderate ug severe cases.Matud pa nga kadaghanan sa mga adunay kaya ang magpa-admit gayud sa mga pribado nga tambalanan bisan pa man ug ‘mild’ lang ang kaso hinungdan nga awhag niini nga ipang-refer lang kining maong pasyente sa mga isolation facility.
Samtang, gitataw usab ni Dr. Loreche ang Vicente Sotto Memorial Medical Center (VSMMC) ang gi-convert na usab nga usa ka COVID hospital diin naggamit na ang 50 ngadto sa 60 porsyento nga kapasidad niini.
Gawas sa pag-expand sa kapasidad sa mga tambalanan sa pagdawat ug mga COVID-19 patients, giingong usa usab sa lantawon mao ang uban pang mga konsiderasyon susama na lang sa manpower, diin adunay mga medical healthcare workers ang nakutloan sa kinabuhi gumikan sa virus, samtang ang pipila usab ang mi-resign na sa ilahang trabaho. | SBR
