Subling nipahimangno ang Highway Patrol Group Central Visayas sa tanang motorista nga dili mo-drive kung hubog.
Kini ang gipaambit ni HPG 7 Officer-in-Charge PLTCOL. Wildemar Tiu nunot sa sunod-sunod nga natala nga insidente sa kadalanan nga gikatahong anaa ubos sa impluwensya sa ilimnong makahubog.
Gihimug-atan ni Tiu nga ang hugot nga pagdili sa pag-drive samtang hubog gumikan sirado ang ‘senses’ sa usa ka indibidwal nga makadesisyon.
Hinungdan nga ilang gi-awhag ang tanang motorista nga kung naka-inom kay mopahuway usa o paabot nga mahuwasan hilabi na karon nga sunod-sunod na ang pagpahigayon og mga part-party.
Gidugang usab niini nga ang maong pahimangno dili lang alang sa mga naka-inom apan lakip na usab ang posibleng madamay niini nga malinawon nga nagbaybay sa kadalanan.
Kahinumduman, unang gitaho nga sa rehiyon siyete adunay natala nga 11,313 ka mga aksidente sa dalan gikan sa Enero hangtod sa Oktubre 2025.
Diin adunay gibana-bana nga 240 niini ang miresulta sa hinanaling kamatayon.
