CENTRAL VISAYAS- Gipasakaan og kasong kriminal ang laing tulo ka mga bag-ong indibidwal kalabot sa nagpadayong imbestigasyon sa usa ka scam hub sulod sa IT Park sa dakbayan sa Sugbo.
Sa gipagawas nga report sa Regional Anti-Cybercrime Unit 7 (RACU 7) pinangulohan ni PLTCOL Jumark Q. Caña, ang reklamo batok sa tulo ka mga suspek nga giilang sila si “Remuel,” “Edean,” ug “Raven” gipasaka sa regular filing niadtong Hulyo 18 sa Office of the City Prosecutor sa Guadalupe, Cebu City.
Sila nag-atubang og kalapasan sa Section 11 sa Republic Act 11765 o ang Financial Products and Services Consumer Protection Act ug inubanan sa Section 6 sa Republic Act 10175 o ang Cybercrime Prevention Act of 2012.
Kini nunot sa naunang pag-ila sa upat ka laing mga indibidwal nga nalambigit sa samang malimbungon nga investment scheme.
Ang kaso gibase sa warrant subpoena alang sa electronic copy sa dokumento nga giisyu ni Hon. James Stewart Ramon E. Himaloan, Presiding Judge sa RTC Branch 7, Cebu City.
Matod ni Police Brigadier General Redrico A. Maranan, Regional Director sa PRO7, desidido ang kapolisan sa pag-ila sa tanang nalambigit sa modus operandi.
Sa pagkakaron, naka-docket na ang kaso ug nagpaabot sa resolusyon gikan sa Office of the City Prosecutor.
