Gipahibalo ni Israeli Prime Minister Benjamin Netanyahu sa tibuok kalibutan atol sa iyang pakigpulong sa United Nation General Assembl nga ang Israel magpadayon sa pagpakig-away sa militanteng Hezbollah ug pagpildi sa Hamas sa Gaza strip hangtod nga makab-ot nila ang hingpit nga kadaugan.
Sumala ni Netanyahu, ang Israel adunay katungod sa pagwagtang niini nga hulga ug sa pagpabalik sa ilang mga lungsuranon nga luwas sa ilang mga panimalay ug mao kini ang ilang gibuhat.
Gipadayag usab sa Israeli PM nga ilang ipadayon ang pagpaubos sa militanteng Hezbollah sa Lebanon hangtod nga makab-ot ang tanan nilang mga katuyoan.
Gipunting ni Netanyahu nga ang Iran nahimong usa ka destabilizing force sa rehiyon sa Middle East tungod sa suporta niini alang sa Hezbollah ug Hamas hinungdan nga gipasidan-an ni Netanyahu ang Iran nga mobalos sila kung maglunsad kini og strike batok sa Israel.
Gidepensahan usab ni Netanyahu ang gilusad nga air strike sa Israel sa Lebanon nga gitarget ang lider sa grupo, nga si Sheikh Hassan Nasrallah.
Ang Israeli military unang mitaho nga ang Hezbollah leader napatay sa ilang gilusad nga air strike sa headquarters sa militanteng grupo sa Beirut.
Samtang, gawas sa UN General Assembly, ang mga nagprotesta nagpahigayon og demonstrasyon batok sa Netanyahu ug sa mga palisiya sa Israel. Daghang mga delegado usab ang nag-walk out sa pag-abot ni Netanyahu sa General Assembly lakip ang delegasyon sa Iran.
Ang pagpakita ni Netanyahu sa UN General Assembly anaa sa tunga-tunga sa mga paningkamot sa International mediators aron mapugngan ang usa ka all out nga gubat diin ang US ug uban pang mga kaalyadong nasud unang nanawagan alang sa usa ka 21 ka adlaw nga ceasefire tali sa Lebanon ug Israel.
