Gipasidan-an sa Japan ang China batok sa sunod-sunod nga pagpalupad sa mga fighter jet sa Beijing sa Exclusive Economic Zone sa Japan ug sa Pacific Ocean.
Agi’g tubag, gipakusog sa Japan ang militar niini sa mga isla sa habagatan-kasadpan, lakip ang pag-deploy sa mga long-range cruise missiles.
Sa miaging bulan, gisulayan usab niini ang short-range surface-to-ship missile isip bahin sa mga depensa.
Una niini, giakusahan sa Beijing ang Japan sa pagpaniid sa mga regular nga military drills ug nihangyo nga ila kining ihunong.
Gisaway usab sa Japan ang nagkadako nga presensya sa mga barkong iggugubat sa China sa Pasipiko — nga nagdoble ang gidaghanon duol sa Taiwan ug sa isla sa Yonaguni.
Diin sa miaging bulan, duha ka Chinese aircraft carrier ang nakita usab nga naglihok nga dungan sa Pacific.
Gawas sa China, ang 534 ka panid nga taho sa depensa sa Japan naghisgot usab sa hulga nga gipahinabo sa North Korea, nga giingong nag-develop sa nuclear missiles ug solid-fuel ICBMs nga makahimo sa pag-igo sa Japan ug sa United States mainland.
Gikutlo usab niini ang nagkalawom nga alyansa sa militar tali sa China ug Russia, ug ang aktibong mga kalihukan sa Russia sa palibot sa Japan – lakip ang paglapas sa airspace sa Japan kaniadtong Septyembre sa miaging tuig.
Samtang, ang Taiwan nagpahigayon usab og 10 ka adlaw nga live-fire military drills isip pagpangandam sa posibleng pagsulong sa China.
