CENTRAL VISAYAS- Lauman sa Kabisay-an nga momenos na ang pag-uwan human sa pagkuso-kuso sa bagyong Opong nga nagbilin og dakong kadaot sa daghang bahin sa Pilipinas diin mikabat pa sa 6 ka landfall sa wala pa kini hingpit nga nibiya sa nasud.
Mao kini ang gipaambit ni Engr. Oscar Tabada, kanhi Meteorologist nga makasinati na og maayong panahon ang Kabisay-an karong adlawa hangtud ugmang adlawa.
Apan, giawhag pa gihapon niini ang katawhan nga magmatngon ug magpabiling alerto hilabi na nga sa katapusan sa Setyembre kay mosulod ang lain na usab nga bagyo nga mao ang gitawag nga Paulo sa sunod nga mga semana.
Hinuon, sa Northern Luzon kini nga moigo apan lauman nga makabaton gihapon og habagat ang Sugbo.
Mipadayag usab og pasalamat si Cebu City Councilor Dave Tumulak, ang chairman sa Disaster Risk Reduction and Management sa dili grabeng kadaot nga gibilin sa Bagyong Opong.
Atol sa pakighinabi sa Bombo Newsteam sa konsehal gipaambit niini nga dako og tabang ang hingpit nila nga pagpangandam sa paghapak sa Bagyo gahapong adlawa.
Diin ang ilang pakig-alayon sa mga kabarangayan ug mga responders nga nitabang ug niabag sa pag-monitor aron masiguro nga mahatagan dayon og hinanaling tabang kon gikinahanglan.
Ingon man ang pagpre-position sa emergency rescue unit Foundation sa mga heavy equipment nga gitahasan sa nagkadaiyang dapit sa dakbayan sa Sugbo aron dali na kini nga marespondihan sa bisan unsang motumaw nga problema.
Gani, gumikan sa nakita nga maayo nga lakang kay nagplano karon ang lokal nga kagamhanan nga mopalit pa og dugang ekipo.
