Giangkon sa usa ka kanhing opisyal sa Department of Public Works and Highways (DPWH) nga migamit siyag duha pa ka opisyal sa ahensya isip taytayan aron ihatag kaniya ang P130-milyon nga giingong timaan sa pasalamat gikan kang kanhi Ako Bicol party-list Rep. Zaldy Co.
Sa iyang unang pag-atubang isip state witness atubangan sa Sandiganbayan Sixth Division, gibutyag ni kanhing DPWH Undersecretary Roberto Bernardo ang giingong sistema sa bribery.
Diin ang testimonya may kalabotan sa mga kaso sa malversation nga giatubang sa 16 ka mga indibidwal, lakip si Co ug uban pang kanhing opisyal sa DPWH, tungod sa giingong substandard nga proyekto sa Oriental Mindoro.
Sumala ni Bernardo, nakadawat siya og P100-milyon nga bahin nga gipaagi sa kanhing DPWH First District Engineering Office District Engineer Henry Alcantara, samtang ang dugang nga P30 milyon gipaagi kang kanhing DPWH 4B Regional Director Gerald Pacanan.
Sa dihang gipangutana ni Associate Justice Sarah Fernandez kon unsa ang katuyoan sa maong kwarta, mitubag si Bernardo nga kini usa ka timaan sa pasalamat sa hapsay nga transaksyon uban ni Engineer Alcantara.
Ang giingong gipasa ngadto kang Alcantara gibahin ngadto sa P40 milyon sa 2023, P40 milyon sa 2024, ug P20 milyon sa 2025. Diin ang pundo nga gipasa ni Pacanan gibahin ngadto sa P10 milyon matag tuig sulod sa samang panahon.
Giklaro sa kanhi undersecretary nga wala niya personal nga nadawat ang kwarta, apan gipasa kini pinaagi sa iyang mga aide.
Si Alcantara usa usab ka state witness sa pagkakaron, samtang si Pacanan usa ka co-accused sa kaso.
