Miabot og P274.926 billion ang gigahin sa gobyerno alang pondohan ang flood control projects ubos sa 2026 National Expenditure Program (NEP).
Matod ni Budget Secretary Amenah Pangandaman, sa nasangpit nga pundo, P272.33 bilyones ang mabutang sa Department of Public Works and Highways (DPWH) alang sa ilang Flood Management Program samtang ang nahabiling P2.593 bilyon alang sa Metro Manila Development Authority (MMDA) sa ilang Flood Control Program.
Kini alang sa operasyon ug pagdumala sa nagkalain-laing pumping stations sa National Capital Region.
Ang budget sa MMDA mao ang pagpalambo sa flood control sa Metro Manila aron daling mohubas ang baha.
Gitataw ni Pangandaman nga basi sa ilang budget call, ilang gipasalig ang DPWH ug MMDA nga kinahanglang adunay saktong pagplano ug feasibility studies ug pag-ila sa mga lugar nga ilang butangan sa mga proyekto.
Sa laing bahin, si House Committee on Appropriations Chairman Rep. Mikaela Suansing miingon nga atol sa paghatag sa budget, ilang tukion ang mga flood control projects ug ang matag rehiyon kinahanglang mopresentar ug kinatibuk-ang plano sa pagpaminus sa pagbaha ug pagsiguro nga ang maong proyekto anaa gayud.
