PROVINCE OF CEBU-Milatid na sa ilang tarrif rate sa konsumo sa tubig par asa mga residente ug mga patigayon sa lungsod sa Moalboal sa habagatang Sugbo ang Cebu Provincial Water Resource Authority (PWRA).
Gianunsyo kini pinaagi sa usa ka General Assembly sa maong lungsod nga gipangulohan ni Cebu Provincial Governor Gwendolyn Garcia diin gidiskurso niini ang taripa sa proyrkto sa Kapitolyo nga bulk water supply.
Matod pa sa Kapitolyo nga adunay minimum kini nga singil nga P115 kada buwan gikan sa 1 to 10 cubic meter sa konsumo sa tubig para sa mga residential connection ug dugang P13 ngadto sa P17 matag cubic meters kung malapas.
Para sab sa mga commercial ug industrial establishments sama sa mga resorts kay aduna kini minimum rates sa P230 kada buwan gikan sa 1 to 10 cubic meter sa konsumo sa tubig ug dugang P26 ngadto sa P40 matag cubic meters ung malapas.
Makaserbisyo kini sa mga barangay sa Moalboal sama sa Saavedra, Tubli, Basdiot, Poblacion West, Poblacion East, Tunga, Lanao, Bugho, ug Bala.
Dakong pasalamat usab ang gipaambit ni Moalboal Municipal Mayor Inocentes Cabaron sa pamunuan sa Kapitolyo sa pagdalit niini og pagtagad sa isyu sa ilang lungsod.
Gani gihimug-atan sab sa gobernadora nga gibuhat lang niini ang ilang mandato sa pagpa-arang-arang sa kinabuhi sa matag Sugbuanon.
Gipasabot sa PWRA sa mga konsumidor nga ang taripa nga gitakda sa Kapitolyo susama ra sa rates nga gipahamtang karon sa Moalboal Water Districts.
Sugdan na sa Kapitolyo ang pagpangolekta og binuwan nga bayronon sa higayon nga maaprobahan na sa Cebu Provincial Board ang gitino nga bayronon sa tubig.
Ang Moalboal maoy usa sa 25 ka local government units sa Probinsiya sa Sugbo nga kabahin sa Level III bulk water supply system initiatives sa Kapitolyo, nga nagtumong sa paghatag og treated water sa mga residente.
