CEBU CITY-Nangayo og tabang sa publiko ang kapulisan sa Sugbo, aron makit-an ang ikatulong suspek sa pagpanulis sa usa ka coffee shop sa Salinas Drive sa Barangay Lahug, dakbayan sa Sugbo niadtong Martes, Oktubre 31, 2023.
Nasikop na sa mga otoridad ang duha sa tulo ka mga tulisan nga nakuhaan sa closed-circuit television (CCTV) footage nga nag-viral.
Ang giingong getaway driver nga si Cyrus John Rallos nasikop sa iyang balay sa Barangay Kamputhaw alas 10:30 sa gabii niadtong Martes.
Samtang si Arvin Benedict Malolot, ang nanguna nga tulisan nga nakit-ang mition og armas sa cashier nasikop sa kapulisan sa Barangay Centro niadtong Miyerkules, Nobyembre 1.
Sa laing bahin, si Jiovanie Lagahit alyas “Banban,” kinsa giilang lookout, pabiling gawasnon hangtod ning pagsuwat.
Hinungdan nga si Police Lieutenant Colonel Janette Rafter, Deputy Director for Operations sa Cebu City Police Office (CCPO), nangayo og tabang sa publiko samtang nagpahigayon sila og man-hunt operation aron masikop si Lagahit.
Gibutyag usab ni Rafter nga ang mga sakop sa kapulisan ilabi na ang Mabolo Police Station ang nagsunod sa ilang nasuta nga posibleng nagtago-tago si Lagahit.
