Cebu City-Nakig-alayon ang Cebu City Police Office (CCPO) sa ubang ahensya sa gobyerno aron mabantayan ang hit-and-run nga suspek nga si Aaron Karl Tan ug maseguro nga magpabilin kini sa nasod, hilabi na kung mapasaka na ang kaso niini sa korte.
Si Tan maoy subject sa hold departure order request nga gihimo sa CCPO.
Gibutyag ni Colonel Ireneo Dalogdog, hepe sa CCPO, nga ilahang gihuwat ang korte aron mahatagan og warrant of arrest si Tan.
Giangkon ni Dalogdog nga aduna silay lig-ong ebidensiya batok kang Tan tungod nga ang closed circuit television (CCTV) footage nagpamatuod sa tanang akusasyon, lakip na ang pamahayag sa tulo ka mga saksi nga positibo nga miila sa suspek nga maoy mi-igo ug mipatay sa 23-anyos nga basketball player nga si Jeslar. Larumbe niadtong Pebrero 4, 2024.
Giklaro usab sa hepe nganong gipasaka ang kaso nga murder imbes homicide, pinaagi sa mga ebidensya nga ilang nakita uban sa mga abogado sa pamilyang Larumbe nga nagtumbok nga gituyo sa suspek ang pagpatay sa biktima tungod nga nipadayon kini sa paggukod niini hangtod nga nabangga ang motorsiklo.
Hinungdan nga namatay ang biktima ug nalagpot sa yuta.
Gikadugang niini nga ang insidente nag-gikan sa bangi sa trapiko base sa pamahayag sa pipila ka mga saksi nga naatol usab sa CCTV footage nga nagpakita sa motorsiklo ni Larumbe nga nagsubay sa Gorordo Avenue gikan sa Salinas Drive, Barangay Lahug, nga nag-red light sa intersection sa Gorordo Avenue ug Archbishop Reyes Avenue ug tabok paingon sa F. Sotto Drive.
Apan sa tunga-tunga sa intersection, aksidente niyang nabanggaan ang SUV ni Tan.
Gika-ingon nga si Larumbe nagpadayun og dagan paingon sa F. Sotto Driber imbes mo-atras, ning higayona gigukod na siya ni Tan samtang nag gamit sa iyahang blinker ug wangwang.
Patay ang 23 anyos nga basketbolista sa dihang nadasmagan sa suspek ang iyang motorsiklo pag-abot nila sa Queensroad sa Barangay Kamputhaw.
