CENTRAL VISAYAS- Nisangpot sa pagkasakmit sa gituohang shabu nga mobalor og kapin P11,000,000 tungod sa wala’y puas nga operasyon sa kapulisan sa Central Visayas.
Kini nga mga operasyon sa kapulisan gihimo sa tibuok Central Visayas gikan sa Setyembre 22 hangtud sa 28 ning tuiga.
Matod sa Police Regional Office sa Central Visayas (PRO-7), nga mokabat sa 1,724.80 gramos ang nasakmit sa mga operatiba niining panahona.
Diin ang mga nasakmit nga ebidensiya sa drugas adunay kantidad nga P11,728,640.
Nasikop usab sa mga tinugyanan sa balaod ang 171 ka mga indibidwal tungod sa paghupot og ilegal nga drugas.
Usa sa mga nasikop nga suspek mao si Jenny Macalisang, 20-anyos nga alyas “Papart.”
Nadakpan kini sa drug sting sa Brgy. Subangdaku, Mandaue City, Cebu niadtong Setyembre 24.
Nasakmit sa mga operatiba gikan sa iyaha ang 500 gramos nga illegal nga drugas nga mobalor og P3.4 milyones.
Lakip usab si Macalisang sa listahan isip High-value individual (HVI) nga kasagarang mo-dispose og 500 gramos nga ilegal nga drugas matag semana.
Sa laing bahin, 287 ka mga suspek ang gibalhog sa prisohan human madakpi sa anti-illegal gambling operations diin mikabat usab sa P27,892 ang bet money nga nasakmit.
Ang kampanya sa PRO-7 batok sa loose firearms, sa laing bahin, miresulta sa pagkasikop sa 27 ka mga indibidwal ug pagkarekober sa 94 ka loose firearms.
Dugang pa, nasikop sa kapulisan ang 29 ka Most wanted persons ug 113 ka laing wanted persons pinaagi sa pagpatuman sa warrant of arrest sa samang panahon.
Nunot ning maong mga kalamposan, gidayeg ni PRO-7 regional director Police Brigadier General Anthony Aberin ang mga sakop sa kapulisan nga padayong nagbantay sa kaayohan sa mga lungsuranon.
