CEBU CITY- Gipusil-patay ang usa ka lalaki nga naigo sa iyang agtang sa Sitio Lower Gochan, Barangay Quiot Pardo ning dakbayan sa Sugbo niadtong Biyernes sa gabii, Marso 7, 2025.
Ang biktima kay giilang si Junjie Abay, 24-anyos, lumulupyo sa Purok Kojic, Sitio Galaxy, Barangay Tanke sa dakbayan sa Talisay.
Matod pa sa kabanay sa biktima nga kuyog kini sa ka live-in partner sa dihang gikalit ra kini og pusil sa wala pa mailhing mamumuno nga sakay og motorsiklo.
Ang ka live-in partner sa biktima kay daling nangayo og tabang sa barangay hall human misuway pa ang suspek og gukod kaniya human pusila si Junjie.
Patay diha-diha dayon ang biktima tungod sa samad-pinusilan niini sa agtang gikan sa armas sa wala pa matinong kalibre.
Gikatahong daling nakaikyas ang suspek sa maong dapit nga miagi sa mga gagmay eskina nga adunay duda nga sweto kini sa maong lugar.
Kasamtangang nagpadayon ang imbestigasyon sa mga sakop sa kapulisan sa maong insidente sa kamatayon sa 24-anyos nga lalaki.
