Gidakop sa mga awtoridad sa India ang usa ka lalaki nga nagtukod ug usa ka embahada ug nagpakaaron-ingnong embahador sa usa ka peke nga nasud aron sa pagdani sa mga tigpamuhunan.
Ang suspek giila nga si Harshvardhan Jain, diin iyang gibutang ang peke nga embahada sa usa ka bungalow sa Ghaziabad.
Aron mahimo ang iyang kaugalingon nga mas katuohan, nagpakita siya nga usa ka adunahan ug impluwensyal nga embahador.
Nigamit kini og peke nga mga dokumento, ug nagbutang pa og mga bandera sa hinimo-himong mga nasod sama sa “Ladonia”, “Poulva”, “Seborga” ug “Westarctica” sa gawas sa building.
Gironda sa Special Task Force (STF) sa Uttar Pradesh Police ang peke nga embahada ug gidakop si Jain.
Upat ka mga sakyanan nga adunay peke nga diplomatic number plates, peke nga diplomatic passport alang sa 12 ka peke nga mga nasud, peke nga mga logo sa nasud, ug uban pa ang nakuha gikan kaniya.
Sa pagkakaron anaa na kini sa kustodiya sa kapolisan ug nag-atubang og daghang kaso.
