CEBU CITY-Hingpit nang ibalhin ang regional office sa Department of Health – Central Visayas (DOH-7) nga mahimutang sa Cebu South Road Properties (SRP).
Kini human sa pormal nga paglagsa sa Deed of Donation tali sa kagamhanang dakbayan sa Sugbo nga giprepresentaran ni Cebu City Mayor Raymond Alvin Garcia ug sa kadagkuan sa DOH-7 nga girepresentaran ni Regional Director Jaime Bernadas kagahapong adlawa sa Lunes, Disyembre 16, 2024 sa Cebu City Hall.
Ang kasabotan nga gilagdaan maoy nahimong pormal sa land-swap deal diin ang duha ka ektarya nga yuta sa SRP idonar sa DOH-7 bugti sa Cauit Island nga giokupar na karon sa kagamhanang dakbayan.
Kaniadto sa dihang wala pa ma-reclaim ang Cauit Island kay orihinal kining gipanag-iya sa Bureau of Quarantine, ubos sa DOH.
Matud pa ni Mayor Garcia nga sa dihang gibawi sa dakbayan ang 295 ka ektarya nga yuta sa SRP nga naglakip sa Cauit Island, adunay kasabotan sa nangaging mga administrasyon nga ang kagamhanang dakbayan unya modonar og yuta ngadto sa DOH-7 bugti niini.
Miabot sab sa 11 ka tuig una naporma ang land swap tali sa duha ka sanga sa gobyerno.
Kon ugaling mahuman na ang regional office sa SRP, ang kasamtangang lokasyon niini nga anaa sa Osmeña Boulevard kay pagabakante na aron magsilbing expansion sa Vicente Sotto Memorial Medical Center (VSMMC).
