Posibling mag-atubang og silot ang legal team ni Guo Hua Ping alyas Alice Leal Guo gikan sa Departament of Justice tungod sa pagsumite sa peke nga counter-affidavit sa qualified human trafficking nga kaso nga iyang giatubang.
Kini maoy gibutyag ni Justice USec. Nicholas Ty nunot sa pag-admit ni Guo sa Senate hearing niadtong Martes, Septiyembre 17 nga nipirma siya sa counter-affidavit sa wala pa mogawas sa nasod niadtong buwan sa Hulyo apan nanotaryohan lang niadtong Agosto 14, dihang wala na si Guo sa nasod.
Base sa jurisprudence, ang notary public kinahanglan nga dili monotaryo sa usa ka dokumento gawas lang kung ang tawo nga mipirma niini mao ang tawo nga nagpatuman niini ug personal nga miatubang sa notaryo aron sa pag-certify sa unod ug kamatuoran sa nalatid sa dokumento.
Kalabot niini, ang opisyal sa DOJ nagkanayon nga ang isyu dinhi mao gyud ang counter-affidavit, dili lang ang notarization.
Mao nga wala na lang siya moingon nga si Atty. Elmer Galicia nga ninotaryo sa counter-affidavit apan bisan ang mga abogado ni Guo manubag kay gikan kanila ang counter-affidavit, ila usab kining gilakip sa motion to admit, ug apil usab sila sa record sa DOJ.
Matud pa ni USec. Ty nga ang mga abogado ni Guo nakabenepisyo sa counter-affidavit tungod kay kini maoy hinungdan sa pagkalangan sa kaso.
Dugang usab sa opisyal nga walay pagduda nga peke ang counter-affidavit ug dili angay nga sundogon sa mga abogado ni Guo kining maong batasan.
Ingon man nga segurado na ang DOJ nga mopasaka og kasong disciplinaryo sa Korte Suprema tungod sa posibleng sayop nga binuhatan sa mga abogado ni Guo.
