CEBU CITY-Gidagsa ang Basilica Minore Del Sto. Niño alang sa mga pilgrims ug mga deboto human subling gi-ablihan ang simbahan kagahapon, Agosto 1,human usab napa-ubos sa General Community Quarantine (GCQ) ang Cebu City.
Matud ni Mildred Monel ang security guard sa Basilica sa dihang nahinabi sa Bombo News Team nga gikalipay usab nila nga nangabli na ang Basilica ug nabalik na ang ilang trabaho. Nanghinaot kini nga mabalik na ug gawasnon nga nga maka- ampo angpubliko ug makaduaw na simbahan sanglit lahi ra ang pagsulod gyud sa simbahan itandi kung sa balay lang mag-ampo.
Adunay usa (1) ka entrance ug usa (1) ka exit sa Basilica aron nga malikayan ang pagsugatay sa mga tao ug ang pagtakod sa Covid-19. Abli na usab ang dagkotanan sa kandila samtang ang benerasyon sa imahe ni Sr. Sto Niño ipahigayun sulod sa simbahan atubangan sa Marble Chapel niini.
Nasayra nga sa dili pa musulod sa Basilica, manghugas una sa kamot sanglit aduna nay handwashing area sa maong dapit.
Sa dili pa hingpit nga makasulod, i-check pa ang temperatura gamit ang thermal scanner pinaagi usab sa mga security guards nga nakasul-ob og Personal Protective Equipment (PPE).Hinoon, misanong ra ang katawhan sa ilang gipatuman nga protocol.
Sa pagkakaron suspendido gihapon ang pagpangumpisal sa Basilica samtang nagpabilin gihapong sirado angadoration chapel. | via Bombo Joan Gantalao
