Nagprotesta ang liboan ka mga tawo sa Denmark ug Greenland batok sa sugyot ni President Donald Trump nga paliton ang Greenland gikan sa Denmark.
Gisulti sa mga demonstrador nga ang teritoryo sa Arctic angay modesisyon sa kaugalingon niini.
Sa Copenhagen, kapin sa 20,000 ka tawo ang nagmartsa padulong sa US Embassy, nag-awit og “Greenland is not for sale” ug nagdala og mga banner nga “No means No” ug “Hands off Greenland.”
Ang uban nagsul-ob og pula nga “Make America Go Away” caps, parody sa “Make America Great Again.”
Sa Nuuk, gatusan ang nagprotesta, lakip ang Prime Minister Jens-Frederik Nielsen, nga naggunit og bandila ug banner.
Miingon si Trump nga importante ang Greenland sa seguridad sa US tungod sa estratehikong lokasyon ug mineral, ug wala niya gisalikway ang posibilidad sa puwersa militar aron maangkon kini, ang pahayag nakapukaw og krisis sa diplomasya tali sa US ug Denmark, nga gikondenar sa NATO.
Ang Greenland, nga adunay populasyon nga 57,000, adunay dakong awtonomiya sukad 1979 apan nagpabilin ubos sa Denmark sa depensa ug langyaw nga palisiya. Ang tanang lima ka partido sa parlamento pabor sa pag-angkon og kagawasan sa umaabot, bisan pa nga mas gusto nilang magpabilin sa Denmark kaysa moapil sa US.
