CEBU CITY-Personal nga gisusi sa bag-ong LTO Chief, Assistant Secretary Atty. Vigor Mendoza II ang isyu kabahin sa mga unclaimed motor vehicle ug motorcycle nga mga plaka sa Central Visayas.
Giabyanan sa Regional Director sa LTO 7 ang pagbisita ni Asec. Mendoza II sa mga nahimutangan sa motor vehicle ug motorcycle plates sa ‘impounding facility’ sa dakbayan sa Talisay, Cebu.
Gibutyag ni Mendoza nga ang tumong sa iyahang pagbisita sa Sugbo aron matubag ang mga nagtipun-og nga wala ma-claim nga mga na-assign ug na-issue nga ‘plate numbers’ sa Central Visayas nga nikabat na kapin sa 600,000.
Sa bulan sa Hunyo 2023, nga adunay kinatibuk-an nga 71,564 nga wala ma-claim nga mga plaka sa motor samtang 528,772 nga mga plaka sa motorsiklo sa rehiyon.
Nasayran, nga ang mga natipun-og ug wala ma-claim nga mga plaka sukad pa kaniadtong 2018.
Dugang pa sa LTO Chief, nga nakig-alayon na kini sa mga motor vehicle ug motorcycle dealers arun mopaspas ang pag-release sa mga plaka.
Matud pa sa Regional Director nga si Glen Galorio nga human sa marching oder ni Department of Transportation Secretary Jaime Bautista nga paspasan na ang pag-release sa mga wala ma-claim nga mga plaka.
Sa pagkakaron, aduna nay kapin sa 20,000 ka mga plaka nga gipagawas pinaagi sa mga dealers nga miresulta sa dakong pagkunhod sa ‘plate backlogs’ sa mosunod nga duha ka bulan.
