MANDAUE CITY-Gipasirado sa kagamhanang dakbayan sa Mandaue pinaagi sa buhatan niini sa Business Permits and Licensing Office (BPLO) ang anaa sa pito (7) ka mga patigayon kinsa gidudahang nagpalihok og POGO-like operations sa pag-inspeksyon niini.
Kini ang gipahibalo ni Atty. August Lizer Malate, ang pangu sa Mandaue City BPLO sa usa ka media forum niini kagahapong adlawa sa Biyernes, Disyembre 13, 2024 nga matod pa labing menos pito ka mga electronic gaming ug customer service nga negosyo sa Mandaue City ang gibawi sa PAGCOR ang ilang lisensya tungod sa mga paglapas sa regulasyon.
Matod pa nga ilang gisusi ang mga online gaming establishments ug Business Process Outsourcing (BPO), uban sa koordinasyon sa City Legal Office (CLO) ug sa Mandaue City Police Office (MCPO), ilabi na sa pagsusi sa ilang permits ug sa matang sa ilang operasyon.
Dugang pa sa opisyal nga adunay mga 10 ka online gaming establishments dinhi ug 100 ka BPOs sa dakbayan diin adunay dul-an sa 2,000 ka mga empleyado nga nagtrabaho sa BPOs ug uban pang IT related works sa dakbayan.
Gawas sa pagtan-aw sa ilang mga permiso, ang BPLO mopahigayon usab og mga interbyu ug mag-obserbar sa ilang mga operasyon sa mga patigayon.
