Posibleng hisgutan sa mga opisyal nga motambong sa ASEAN Foreign Ministers’ Retreat karong semanaha ang mga isyu sa South China Sea ug West Philippine Sea, matod sa tigpamaba sa mga kalihokan sa ASEAN.
Matud ni Dax Imperial nga ang retreat, usa ka closed-door meeting, magtugot sa mas prangka nga mga diskusyon, ug lakip na niini ang gawasnon nga maghisgot sa mga isyu nga gusto nilang ipadangat, nga mahimong maglakip sa South China Sea ug West Philippine Sea.
Gikumpirma usab niini nga ang tanang mga langyaw nga ministro sa ASEAN motambong, gawas sa Myanmar apan dunay ipadala nga usa ka senior official nga adunay ranggo nga Permanent Secretary of Foreign Affairs.
Gawas sa mga angay buhaton, ang onse ka estado maghisgot usab sa mga isyu sa rehiyon ug kalibutan, lakip na ang South China Sea ug ang West Philippine Sea, usa ka prayoridad nga isyu para sa Pilipinas.
Sa laing bahin, ang seguridad sa mga delegado sa Lapu-Lapu City giseguro human sa hingpit nga pagpangandam sa kapulisan ug mga force multiplier aron masiguro ang kaluwasan ug kahapsay sa usa ka semana nga miting.
Kini gipaambit ni PCapt. Edcel Petecio, ang tigpamaba sa LCPO, diin ang mga bisita gikan sa ubang mga nasud makasiguro nga dili sila kinahanglan mabalaka bahin sa ilang kaluwasan kung adunay wala damha nga kagubot.
