CEBU CITY-Mihatod og dugang pahimangno ang mga kadagkoan sa Commission on Elections (COMELEC) ngadto sa publiko kabahin sa mga angayang buhaton sa nagsingabot nga Barangay at Sangguniang Kabataan Elections (BSKE) 2023.
Unang-una na niini mao ang pagpahibalo nga manual o mano-mano ang pagpahigayon sa maong eleksyon, nga nagpasabot nga walay Precinct Count Optical Scanner (PCOS) machine nga gamiton.
Mao kini ang gibutyag ni Atty. Aanna Fleur Abelgas-Gujilde, election officer IV sa COMELEC-7.
Matod sa opisyal nga dili parehas sa nasudnong eleksyon, mas mubo ang oras aron makabotar sa BSKE karung umaabot nga Lunes.
Gitino niini nga ang voting hours sa umaabot nga piniliay kay magsugod sa alas 7 sa buntag ug matapos sa alas 3 sa hapon.
Gidugang usab sa opisyal nga sukwahi sa naandan sa national elections nga igo lang nga i-shade sa mga botante ang ilahang buot nga ibotar nga kandidato, karung nagsingabot nga BSKE kay gikinahanglang isuwat ang pangalan sa mga kandidato.
Subay niini gipahimangnoan ang publiko nga isuwat ang tibuok pangalan sa ibotar nga kandidato sa wala pa ang adlaw sa piniliay aron dayun-dayun nalang ang pagbotar ug aron dili malibog ang mga tig-ihap sa boto kung ugaling man nga sayup ang masuwat nga pangalan sa kandidato.
