CEBU CITY — Mosanong ang Association of Barangay Captains (ABC) sa dakbayan sa Sugbo sa mando ni Mayor Edgardo Labella nga pahugtan pa ang quarantine protocols sa mga sitio ug barangay.
Matud sa ABC Vice President ug kapitan sa Brgy. Labangon nga si Victor Buendia nga sakto ang nahimong lakang ni Labella ug dili kinahanglanng magpaabot nga managhan pagbalik ang COVID-19 cases sa dili pa pahingusgan.
Gihingusgan ni Buendia nga kinahanglang mapugngan ang pagkuyanap sa kagaw ug usa na niini mao ang pagkontrolar sa lihok sa mga tawo.
Dugang pa niini nga usa ka dakung hagit sa liderato ni Mayor Labella ang pagsulbad sa nasinating pandemya nga maoy nagdala sa pagkahagba sa ekonomiya.
Hinuon wala nahibulong si Buendia nga kalit mosaka ang kaso gumikan sa giingong pagpasagad sa mga tawo sa quarantine protocols.
Nagpaabot si Buendia sa bag-ong guidelines nga ipagawas ni Labella kabahin niini arun nga sundon usab sa mga barangay.
