CEBU CITY — Gikatakdang dad-on sa kaulohan ang usa ka gituohang illegal recruiter human gisikop sa mga sakop sa PNP Anti-Kidnapping Group (AKG) – Visayas Field Unit sulod sa usa ka subdivision sa Brgy. Basak, Lapu-Lapu City.
Giila ang dinakpan nga si Leonora Cantero, alyas “Leigh Abad,” 38-anyos, ug nagpuyo gikan sa kaulohan.
Nasikop atol sa operasyon niadtong Miyerkules, Pebrero 3 si Cantero human pinasikad sa warrant of arrest gikan sa Las Piñas RTC ug Marikina RTC.
Matud ni Police Lt. Zosimo Ravanes Jr. sa PNP-AKG nga nag-atubang si Cantero og kasong large scale estafa ug seven counts of estafa gumikan lang sa ilegal nga pagpang-recruit og trabaho abroad.
Dugang pa niini nga daan nang gipangita sa otoridad ang maong suspek sukad pa niadtong 2014 apan nagmalampuson ang maong operasyon human nakadawat og report gikan sa usa ka informant kabahin sa pinuy-anan sa suspek.
Sa pagkakaron, gipaubos na sa documentation ang pagkasikop ni Cantero samtang gi-andam karon ang mga papeles alang sa pagbyahe niini paingon sa kaulohan.
