CEBU – Gikalipay sa mga Muslim sa Sugbo ang gihimu nga inisyatiba sa kapulisan sa pagsaulog sa Eid’l Fitr sa mismo nga headquarter sa PRO 7.
Daku ang pasalamat ni Ustadz Najeeb Razul, ang Voice of Islam sa Central Visayas, sa paghatag ug pagtagad sa mga Kristiyano ug ilabi na kang Police Brigadier General Debold Sinas, sa ilahang pagsaulug sa Eid’l Fitr.
Matud ni Razul nga nagpakita lang kini ug ti-unay nga Christian-Muslim brotherhood kung diin posibli gayud nga magka-usa ang duha ka relihiyon sa usa ka tinguha, ang kalinaw ug pagkahi-usa.
Dungan nga nag-ampo ang mga Kristiyano ug Muslim, ingun man adunay gipahigayun nga boodle fight sa sulud mismo sa PRO 7 kung diin pulus halal nga pagkaon ang ilahang gisaw-an.
Samtang, nahisusamang ‘picnic’ ang kasaulugan sa Eid’l Fitr sa pipila ka mga Muslim sa Sugbo sa Plaza Independencia kung diin naghikyad kini sila ug mga hapin sa nahisgutang lugar ug nagsalo-salo.
Nagpahigayun usab ug catering alang sa mga Muslim, ingun man ni bisan kinsa nga gustung mukaon, kansang handa kini gikan sa Cebu City Government.
Nasayran nga gitagan-an gayud ug budget sa syudad ang maong kasaulugan.
Gikalipay usab sa usa ka Kenyan national nga Muslim nga si Hussein Osman nga nahilakip kini sa kasaulugan sa Eid’l Fitr dinhi sa Sugbo kung diin mapasigarbuhun niini nga gipadayag ang iyahang kasinati-an, ingun man ang paglampus niini sa bulan sa Ramadan.
Gitawag usab sa Muslim community sa dakbayan sa Sugbo nga Honorary Sultan of Cebu si outgoing Cebu City Mayor Tomas Osmeña.
