TALISAY CITY, CEBU-Gipahibalo sa kapulisan sa Lapu-lapu nga kasagaran sa mga nadakpan nga nalambigit sa pagpamaligya sa ginadiling drugas nga naglihok sa Siyudad sa Lapulapu mga bag-ong drug personalities.
Kini ang gitino sa Hepe sa City Drug Enforcement Unit (CDEU), nga si Major Aibert Jay Samson, nga wala maapil sa listahan sa drug personalities sa Lapulapu ang ilang ulahing mga nadakpan nga nakuhaan og daghan bulto ug pakite sa shabu nga mobalor og minilyon ka pisos.
Matud ni Major Samson nga gikan sa mainland Cebu ang suplay sa shabu nga nasakmit sa Kapulisan sa Lapulapu, apan dunay ubang mga dinakpan nga adunay kontak sulod sa prisohan.
Gisusi sa Kapulisan sa Lapulapu kun adunay koneksyon o susama ba og tinubdan sa ilegal nga drugas ang ilang mga dinakpan.
Sumala ni Major Samson, nga gawas sa Lapulapu, naglihok usab ang pipila sa mga nadakpan sa ubang Siyudad sa Sugbo.
Nasayran nga ang ulahing nadakpan sa Kapulisan sa Lapulapu nakuhaan og shabu nga mobalor og kapin sa P3.7 milyones.
