Gihatagan ni National Police Commission (NAPOLCOM) Executive Director Rafael Vicente Calinisan si Philippine National Police (PNP) Chief, PGen. Nicolas Torre III, og grado nga 9.9.
Kini alang sa dul-an usa ka buwan nga pamunoan sa heneral sukad siya gitudlo isip pangu sa nasudnong kapolisan niadtong Mayo 29, ning tuiga.
Gipasabot ni Calinisan nga ang halos perfect nga grado sa PNP Chief tungod sa mga inisyatiba nga iyang gihimo alang sa kapulisan ug publiko nga nagpakita nga nabati niya ang gikinahanglan sa publiko, nga matud pa nga matubag sa iyang liderato isip hepe sa kapolisan.
Gitataw sa kadagkoan sa Napolcom nga ang gikinahanglan sa nasudnong kapolisan mao ang action man nga makahimo sa iyang trabaho ug katungdanan, butang nga napakita ug nakaya sa PNP Chief.
Dugang pa niini nga ang nahabilin nga usa ka punto, mahimong magsilbi nga inspirasyon ni Torre sa paghimo sa iyang mga katungdanan.
Giklaro sa opisyal nga ang grado nga 9.9 dili tungod kay kuwang pa sa iyang katungdanan ang hepe apan kinahanglan usab nga adunay inspirasyon sa iyang trabaho.
