Gipaalerto sa Office of the Civil Defense (OCD) ang publiko sa posibleng delikadong epekto sa shear line ug intertropical convergence zone (ITCZ) nga nakamugna og sobrang pag-uwan sa daghang bahin sa nasud karong bag-o lang mikalas og 5 ka tawo.
Gi-isyu ni OCD Administrator USec. Ariel Nepomuceno ang memorandum sa tanang regional directors nga nagmando kanila sa pagpaaktibo sa enhanced disaster response protocols ug pagsiguro nga ang mga komunidad andam taliwala sa hiniusang epekto sa shear line ug ITCZ.
Matod niya, taliwala sa nagpadayong gikataho nga mga pagbaha nga miresulta sa pagkalas sa kinabuhi, pagkadaot sa kabtangan sa lain-laing rehiyon, importante nga mohimo og mahukmanong aksyon aron malikayan ang dugang nga pagkawala sa kinabuhi ug kadaot.
Ang opisyal sa OCD nipahimangno nga dili ibaliwala sa publiko ang epekto sa weather systems tungod kay mahimong sama ka katalagman sa mga bagyo nga miigo sa nasod niadtong Enero 2023 diin 43 ka kinabuhi ang nakalas sa Kabisay-an ug Mindanao tungod sa pagbaha ug pagdahili sa yuta sa kusog nga ulan dala sa shear line.
Basi sa pinakabag-o nga datos gikan sa OCD niadtong Enero 3, 5 ka mga tawo ang namatay sa kasamtangan nga weather systems, 20 ka mga tawo ang nasamdan ug 2 ka mga tawo ang Nawala diin natala kini sa MIMAROPA, Eastern Visayas ug Davao region.
Kalabot niini, kapin sa 139,000 ka pamilya ang apektado samtang kapin sa 500 ka pamilya ang gipabakwit sa mga evacuation center.
