Gibasura sa Ombudsman ang motion for consideration nga gisang-at ni Kanhi Cebu Governor Gwendolyn Garcia nga nagtinguha nga balihon ug ibasura ang desisyon sa anti-graft investigating body sa estado nga nakahukom nga sad-an siya sa mga kasong administratiba sa mga operasyon sa pag-quarry sa Mananga River, Talisay City, Cebu.
Naggikan ang kaso niadtong Abril 21, 2025 nga reklamo ni Deiparine, kinsa mipasangil kang Garcia og grave abuse of authority, gross misconduct, serious dishonesty, gross negligence, ug violation of the Code of Conduct and Ethical Standards for Public Officials and Employees (RA 6713).
Kahinumduman nga gipaubos sa preventive suspension si Garcia gumikan sa giingong mi-isyu kini og Special Permit sa Shalom Construction, Inc. niadtong Mayo 14, 2024 nga walay Environmental Compliance Certificate o Certificate of Non-Coverage gikan sa Department of Environment and Natural Resources.
Hinungdan nga nimando ang Office of the Ombudsman nga ipaubos sa preventive suspension si Garcia sa unom-ka buwan nga walay bayad ug walay laing makababag niini gawas lang sa usa-ka competent court.
Ingon man nga nidepensa kini nga ang giisyu nga permit kay agi-lamang sa pagtubag sa grabeng kanihit sa tubig nga nakaapekto sa dakbayan sa Sugbo ug kasikbit nga mga lokalidad ubos sa Metropolitan Cebu Water District.
Gihimug-atan usab ni Garcia, nga ang maong mga lakang gihimo sa koordinasyon sa mga hingtungdan nga ahensya ug awtoridad ug dili sa kaugalingo’ng interes. | via Bombo Jun Salde
