CEBU CITY — Gibutyag ni Cebu City Mayor Edgardo Labella nga misaad ang Vallacar Transit, ang operator sa Ceres Bus Liner ngadto kaniya nga tarangon ang operasyon niini sa syudad human malambigit sa sagunson nga mga insidente sa kadalanan.
Matud ni Labella nga nipaubos sa seminar ang mga drayber sa maong bus arun masayud sa balaod sa kadalanan sa dakbayan.
Gihimug-atan sa mayor nga speed limit ang usa sa ilang solusyon nga gi-implementar, diin striktong gipatuman ang 40 kilometer-per-hour nga limit sa mga mo-aging bus sa national highway; ug 20 kph sa mga secondary road.
Samtang, gidili usab ni Labella ang mga bus nga mosulod sa mga residential road tungod sa kahuot sa dalan.
Gidid-an usab ang maong mga bus sa pag U-turn ngadto sa Brgy. Bulacao-pardo o boundary sa syudad sa Talisay ug dakbayan sa Sugbo.
Misaad ang mayor nga tangtangon ang mga bus sa Vallacar Transit kung malambigit man usab sa aksidente ug hulipan og laing mga operators kinsang nakig-alayon na ngadto kaniya.
