Gipirmahan na ni outgoing Cebu Governor Gwendolyn Garcia ang gimugna nga Executive Order No. 16 series of 2025 aron masiguro ang tukma nga pagbalhin sa mga rekord, mga dokumento, ug mga kabtangan sa Kapitolyo sa bag-ong mga napili, re-elected nga mga opisyal sa Probinsya.
Kini aron masusi ang mga nahimo, mga programa nga nanggawas, ug umaabot nga mga inisyatibo sa gobyerno.
Gipirmahan kini ni Garcia, uban ni Bise Gobernador Hilario Davide III isip bise chairman sa maong transition team.
Kini subay sa Memorandum Circular No 2025-016 sa DILG nga gipirmahan ni Sec. Jonvic Remulla niadtong Marso 3, kini alang sa pagtukod ug mga operasyon sa mga local governance transition teams aron mapadali ang hapsay nga pagbalhin sa mga responsibilidad ug ipadayon ang pagpadayon sa serbisyo human sa eleksyon, pagminus sa mga pagkabalda ug paghatag katin-awan alang sa mga outgoing ug umaabot nga mga opisyal.
Sa pikas bahin, gipaambit usab ni Governor-elect Pamela Baricuatro nga iyang undangon ang naandan na nga Pasigarbo sa Sugbo ug Suroy-Suroy sa Sugbo.
Matud pa ni Baricuatro, nga ubos sa iyang administration iya kining wagtangon tungod kay nag usik-usik lang kini sa kwarta sa katawhan.
Dugang pa ni Baricuatro, nga imbes mag Suroy-Suroy Sugbo, mas hatagan niya og pagtagad ang “Mobile Clinics” ug mga “Mobile Kitchen” nga maoy mag suroy-suroy sa mga kalungsuran arun mahatagan og pagtagad ang serbisyo sa panglawas ug kagutom alang sa mga Sugbo-anon. | Bombo Nathaniel Sandoval
