CEBU CITY- Nasakmit ang mokabat sa P20.5 milyones nga balor sa ilegal nga drugas sa hiniusang operasyon sa Cebu City Police ug Philippine Drug Enforcement Agency sa Central Visayas ug mga personahe sa Waterfront Police Station 3 atol sa buy-bust operation sa Barangay Tejero, dakbayan sa Sugbo, Biyernes sa gabii, Nobiyembre 29, 2024.
Nakuha sa operasyon ang 3,020 grams nga shabu gikan sa usa ka maglive-in Partner nga gibanabanang mobalor og P20,536,000.
Giila ang mga nasikop nga sila si Joanna Gallado ug ang live-in partner niini nga si Raymund Jorge a.k.a. “BAGMON” usa ka High Value Indibidwal nga usa ka Pusher ug na-apil sa Drug Watch list, ang duha nagpuyo sa Back Blessed, Brgy., Tejero, Cebu City.
Sa pakighinabi sa Bombo Newsteam kang PCol. Antonietto Cañete, ang City Director sa Cebu City Police Office, gitino niini nga ang maong drugas gikatahong gikan sa Mindanao, diin ang magtiayon makahimo sa pag-apod-apod og usa ka kilo matag semana sa Cebu City, Mandaue City, Talisay City ug Lapu-Lapu City.
Gidugang ni Col. Cañete, nga kini subay sa ilahang gihingusgan nga paningkamot ug lakang aron sa pagsumpo sa kriminalidad sa Dakbayan sa Sugbo.
Dugang pa, nga gipalig-on usab niini ang pasalig sa pagsiguro sa usa ka luwas nga palibot alang sa tanan nga mga lungsuranon, ilabi na sa umaabot nga mga selebrasyon sama sa Pasko og sinulog 2025.
Ang mga suspek gitanggong sa Waterfront Police Station detention cell sa dakbayan sa Sugbo samtang nagpaabot sa pagpasaka og kaso.
