Gisaway ni Presidente Ferdinand Marcos Jr. ang duha ka mga proyekto sa imprastraktura sa Kennon Road, nga gitawag niini nga sobra ang presyo ug substandard.
Una niyang gikutlo ang P114-million nga rock netting project nga nahuman niadtong 2018–2019, diin matod sa Presidente, imbes nga maghatag og proteksyon batok sa pagdahili sa yuta, nakamugna pa kini og dugang kakuyaw sa mga motorista ug mga residente.
Gisaway usab sa Presidente ang P260-million nga rock shed project sa Camp 6 nga nakaangkon og kadaot pipila lang ka bulan human sa pagtukod niini, hinungdan sa pagsira sa usa ka bahin sa dalan.
Dugang niya nga tataw nga walay kapuslanan ang duha ka proyekto ug niresulta lang sa pag-usik-usik sa pundo sa publiko.
Dugang pa sa Presidente nga dili niya itugot ang maong matang sa pagpabaya ug kurapsyon, busa iyang sigurohon nga matul-id ang mga problemadong proyekto sa dili pa siya mokanaog sa katungdanan aron dili na mabutang sa peligro ang kinabuhi ug panginabuhi sa mga Pilipino.
