LAPU-LAPU CITY, CEBU-Nasakmit sa mga sakop sa otoridad ang kapin sa 7,000 ka gramos sa illegal nga drugas gikan sa usa ka mananagat ug giilang High Value Target, nga gibana-banang mo balor og P47,600,000 niadtong adlawng Dominggo, Mayo 11 sa Sitio Ibabao, Brgy. Agus, Lapu-Lapu City, usa ka adlaw sa dili pa ang piniliay.
Giila ang dinakpan sa alyas nga “Eme” 35-anyos, residente sa Purok Calachuche, Brgy. Gilotongan, Cordova Cebu.
Nasikop ang suspek pinaagi sa hiniusang operasyon sa mga sakop sa Lapu-Lapu City Police Office ug Philippine Drug Enforcement Agency Regional Office-7.
Gisubay ang tinubdan sa maong ginadiling drugas nga gituhuang gikan sa laing nasud nga dili sa China sanglit giputos kini ug mga tea bags nga dunay marka nga Côte d’Ivoire’ nga buot pasabot Ivory Coast sa Africa.
Gipaambit usab sa mga kapulisan nga taud-taud na nga gipaubos sa surveillance ang suspek ug nalit-ag gayud kini sa maong malampuson anti-drug operation.
Gipalawman karun ang imbistigasyon sanglit bag-o kini nga klase sa modus operandi sa mga sindikato nga nalambigit sa ginadiling drugas sanglit sagad ang mga shahu mga nasakmit sa mga otoridad pinutos ug mga tea bags nga adunay marka nga mga Chinese characters.
Sa pagkakaron, nakaadam na ang kasong ipasaka sa kapulisan bahin niini ug anaa nausab ang suspitsado sa kustodiya sa kapolisan. | Bombo Nathaniel Sandoval
