CENTRAL VISAYAS-Mokabat sa P6.8 milyones nga kantidad sa gituohang shabu ang nasakmit sa mga pulis nga nagdumala sa checkpoint sa Comelec ug nasikop ang 156 ka drug personalities atol sa ilang Simultaneous Anti-Criminality and Law Enforcement Operation (Sacleo) sa Central Visayas gikan sa Septiyembre 2 ug 3, 2023.
Matod ni Police Lieutenant Colonel Gerard Ace Pelare, tigpamaba sa Police Regional Office sa Central Visayas (PRO 7), nasikop usab nila ang 267 ka mga tawo nga nalambigit sa ilegal nga sugal ug 140 ka mga wanted, ug nasakmit ang 153 ka armas nga walay lisensya.
Dugang ni Pelare nga samtang nagkaduol ang botohan sa Barangay ug Sanguniang Kabataan, mas subsob nga gihimo ang mga checkpoint sa Comelec aron masikop ang mga adunay outstanding warrant ug makasakmit og mga armas nga walay lisensya nga mahimong gamiton panahon sa eleksyon.
Sa datus sa PRO 7, dili mominus 26 ka tawo ang natanggong na sukad nagsugod ang Comelec gun ban niadtong Agosto 28.
