MANDAUE CITY-Mipadayag ug komento si Barangay Guizo, Mandaue City Captain Jesus Neri Sr. nga ang pagbawi sa duha ka garbage trucks nga nadestino sa iyang barangay kay signos sa usa ka “political harassment”.
Kini human sa anunsyo sa milabay nga semana ni Mandaue City Administrator Atty Jamaal James Calipayan sa desisyon sa kagamhanang dakbayan sa Mandaue sa pagbawi sa naasoy nga mga trucks mahitungod sa kapakyas sa Barangay government sa pagdumala sa koleksyon sa basura.
Dugang pa ni Calipayan nga kasamtangang pagadumalaan sa kagamhanang dakbayan ang koleksyon sa basura Barangay Guizo aron sa pagsulbad sa maong isyu.
Apan si Kapitan Neri miingon nga nanaingkamot sila sa pagsulbad sa isyu sa basura sa iyang lugar apan tungod sa limitadong empleyado ug sa kadaghan na sa lumulupyo sa barangay hinungdan nga langan ang ilang operasyon.
Gikuwestiyon usab niya nganong gibasol siya sa mga kakulian sa mga tigkolekta og basura nga gibayran sa siyudad.
Hinungdan nga nakatumbok og kahibalo ang Kapitan nga “political harassment” ang maong desisyon kay ingon man karaan nang kaalyado kini sa pamilyang Ouano kinsa pipila ka mga sakop nagkupot og nagkadaiyang posisyon sa gobyerno ug gitumbok nga kaatbang sa politika sa nasuspensong mayor nga si Mayor Jonas Cortes.
