Gipadayag ni Health Secretary Teodoro Herbosa ang lawom nga kabalaka sa padayong pagsaka sa kaso sa human immunodeficiency virus (HIV) sa Pilipinas, partikular na sa mga batan-on nga nag-edad og 15 ngadto sa 25, diin misaka og 500% ang mga kaso kon itandi sa miaging mga tuig.
Sumala sa datos sa Department of Health (DOH), ang bag-ong kaso sa HIV niabot sa 5,101 sa unang quarter sa 2025, 50% nga pagtaas kon itandi sa 3,409 ka kaso sa samang panahon sa miaging tuig.
Katumbas kini sa 57 ka bag-ong kaso kada adlaw, nga naghimo sa Pilipinas nga adunay pinakataas nga ihap sa bag-ong HIV infections sa tibuok Western Pacific region.
Samtang ang monkeypox (o mpox) nga nakadawat og pagtagad sa bag-ohay nga mga bulan, apan gitataw sa DOH nga ang mas dakong hulga mao ang paspas nga pagsaka sa mga kaso sa HIV, ilabi na sa mga batan-on.
Hinungdan nga subling nipasidaan si Herbosa nga kung dili mahunong ang pagkaylap karon, lauman nga moabot sa kapin 400,000 ang gidaghanon sa mga tawo nga adunay HIV sa nasud.
Dili lang kini usa ka isyu sa kahimsog gumikan kini usa ka social issue nga nanginahanglan og kooperasyon sa tibuuk nga gobyerno ug sa tibuuk nga katilingban.
Bisan og mahal ang antiretroviral treatment, libre kini nga gihatag sa mga pasyente pinaagi sa PhilHealth.
Gipasiugda usab ni Herbosa ang kamahinungdanon sa pagpalapad sa HIV testing, dali nga pag-access sa pagtambal, ug pagkunhod sa viral load aron mapugngan ang pagkaylap.
