CEBU CITY- Posibleng maapektuhan ang pipila ka programa sa Cebu City Government kung ugaling magpadayon nga mosaka ang presyo sa krudo ug gasolina, subay sa kasamok nga nahitabo sa Middle East.
Sa interview sa Bombo Radyo Cebu, gibutyag ni Cebu City Councilor Dave Tumulak, chairman sa Committee on Budget sa City Council, nga ang gubat sa Middle East nakaapekto sa global oil supply nga maoy hinungdan sa pagsaka sa presyo sa palaliton ug serbisyo.
Matud pa ni Tumulak nga city budget alang sa unang quarter nga mokabat og kapin sa P14.7 billion posibleng maapektuhan sa inflation ug pagsaka sa presyo sa basic commodities.
Hinungdan, nga gitutokan sa Dakbayan sa Cebu, uban ni Cebu City Mayor Nestor Archival, ang paghimo og mga lakang aron makunhuran ang galastohan sa city government.
Gipasabot niini nga posibleng adunay mga proyekto sa dakbayan nga i-adjust o i-reschedule kon magpadayon ang pagsaka sa presyo sa mga palaliton.
Gipahimangnoan usab sa konsehal ang mga department heads sa city government nga i-prioritize ang pinaka-importanteng gastuhan sama sa suweldo sa mga empleyado ug health-related programs.
Dugang pa ni Tumulak nga ang austerity measures sama sa paggamit og usa ra ka sakyanan alang sa official trips ug paggamit sa electronic communication makatabang sa pagminus sa gasto sa dakbayan.
Busa, gikinahanglan ang kooperasyon sa tanang sektor aron malikayan ang mas dako pang epekto sa pagsaka sa presyo sa mga palaliton sa publiko.
