Nanawagan ang labor group nga Partido Manggagawa sa Regional Tripartite Wages and Productivity Board-7 nga maghatag og emergency wage increase alang sa mga mamumuo sa Central Visayas tungod sa padayon nga pagsaka sa presyo sa petrolyo ug mga palaliton.
Sa pakighinabi sa Bombo Radyo Cebu, giingon ni spokesperson Dennis Derige nga naglisod na ang daghang trabahante sa pagtabon sa adlaw-adlaw nga gastuhan sa pamilya tungod sa pagsaka sa presyo sa gasolina, diesel ug kerosene.
Matud niya nga ang kasamtangang minimum wage sa rehiyon nga P500 hangtod P540 kada adlaw, dako na og naluya ang purchasing power tungod sa pagsaka sa presyo sa lana.
Gipasabot usab ni Derige nga bisan pa og adunay lagda nga usa ka tuig ang hulaton sa pagrepaso sa wage order, mahimo kini ma-review sayo kung adunay supervening event, sama sa kalit nga pagsaka sa presyo sa petrolyo.
Samtang niini, nanawagan usab ang grupo sa gobyerno nga magpatuman og relief measures ug mas higpit nga price monitoring aron maprotektahan ang mga trabahante ug konsumidor batok sa posibleng pagsaka sa presyo sa mga palaliton.
