CEBU CITY-Giklaro sa Department of Social Welfare and Development (DSWD)-7 nga mahimo gihapon nga makuha sa mga Social Amelioration Program (SAP) beneficiaries ang ayuda ngadto sa mga padalahan o mga merchant partners.
Kini human nga nabantayan sa ahensya nga daghang mga beneficiaries ang, matud pa, naglisud sa pagdawat sa hinabang sa gobyerno gumikan kay kinahanglan pang mag-install ug magbaton og account sa usa ka inila nga e-wallet service.
Matud ni Shalaine Marie Lucero, ang Assistant Regional Director for Operations sa DSWD-7, sa dihang nahinabi sa Bombo Radyo Cebu nga nakig-partner ang PayMaya ngadto sa mga bangko, money remittances service, lakip na ang mga tindahan aron himoong mga merchant partners.
Sigon pa niini nga maghimo og account ang maong e-wallet service ngadto sa mga merchant partners aron eligible o kwalipikado sila sa paghatag og kwarta ngadto sa mga SAP beneficiaries.
Pinaagi niini, mahimong makuha sa mga benepisyaryo ang ilang hinabang ngadto sa merchant partner dala ang tracking number ug usa ka valid ID inay nga magdownload pa sa maong PayMaya application.
Dugang pa ni Lucero nga kinahanglang sukit-sukiton mismo sa lokal nga pangagamhanan ang paglista sa mga indibidwal nga angayang makadawat sa ayuda gikan sa gobyerno, agi na og pagsiguro niini.
Nanghinaut karon ang DSWD-7 nga malikayan ang mga nasinating problema ug kahasol atol sa unang hugna sa paghatag og ayuda. | GN
