Mipadayag usab si Presidente Ferdinand Marcos Jr., og pahasubo sa mitaliwan nga Santo Papa.
Pinaagi sa iyang social media account gipaabot niini nga miduyog ang Pilipinas sa Katolikong komunidad sa tibuok kalibotan sa pagsubo sa pagkawala sa Balaan nga Santo Papa.
Usa ka tawo nga adunay lawom nga pagtuo ug pagkamapainubsanon, kinsang nangulo dili lamang uban ang kaalam apan adunay kasing-kasing nga bukas sa tanan, labi na sa mga kabus ug nakalimtan.
Dugang pa niini nga si Pope Francis ang mitudlo kanato nga ang pagkamaayong Kristohanon mao ang pagpaabot sa pagkamabination ug pag-atiman sa usag usa.
Diin ang iyang pagkamapainubsanon kay nakapabalik sa kadaghanan sa panon sa Simbahan.
Sa pagbangotan sa iyang pagkamatay, giila usab niini ang gidala nga paglaum ug kalooy sa kadaghanan ug nagdasig kanato sa paghigugma sa usag usa sama sa paghigugma ni Kristo kanato.
Mipaabot usab og pahasubo si Speaker Ferdinand Martin G. Romualdez sa pagtaliwan ni Pope Francis, kinsa giingong modelo sa kaluoy ug pagpaubos nga nagdala og kaayohan ug paglaom sa minilyon ka mga tawo sa tibuok kalibotan, ilabi na sa mga Pilipino nga nagtawag kaniya og “Lolo Kiko”.
