Gipanghimakak sa Philippine Navy ang gikataho nga maritime patrol sa Chinese navy ug coast guard sa Scarborough shoal nga nailhan usab nga Bajo de Masinloc o Panatag shoal sa West Philippine Sea (WPS) niadtong Sabado, Mayo 31.
Matod sa tigpamaba sa PH Navy for the West PH Sea nga lakip na ang sovereign waters sa Bajo de Masinloc ug sulod sa 200 nautical miles sa PH exclusive economic zone kay walay ingon nga aktibidad nga naobserbahan gikan sa Southern Theater Command sa People’s Coast Guard Army o sa China Liberation Army.
Hinuon, gikompirmar sa hukbong pandagat ang presensya sa 2 ka barko sa Chinese Coast Guard ug unom ka maritime militia vessels sa Bajo de Masinloc.
Matud pa niini nga upat ka fishing boat gikan sa Vietnam ang nakita ug 3 ka fishing vessel gikan sa Taiwan ang naa sa maong shoal.
Gisubli sa opisyal sa PH Navy nga ang maong mga pag-angkon kabahin sa information-shaping operations sa Chinese Communist Party aron matubag ang bisan unsang internal dissent o maghimo og internasyonal nga diskurso nga pabor kanila.
Bisan pa niini, ang PH Navy ug Armed Forces of the Philippines kay magpadayon sa pagbantay ug pagpanalipod sa atong maritime domain samtang nagpabilin nga pasalig sa pagmintinar sa kalinaw ug kalig-on sa rehiyon.
Ang PH Navy nihimo sa maong pamahayag human sa report sa Chinese media nga ang Chinese navy troops giingong nagpahigayon og combat readiness patrol sa kadagatan ug kahanginan sa Scarborough Shoal, nga gitawag sa China nga “Huangyan Dao”.
