Gipaniguro sa Philippine National Police (PNP) nga andam silang mohatag og hinabang kung gani manampit ang Department of Justice (DOJ) ug National Bureau of Investigation (NBI) alang sa umaabot nga pagbalik sa gipalagpot nga magbabalaod nga si kanhi Rep Arnie Teves Jr.
Mao kini ang gipasalig ni PNP chief Gen. Rommel Francisco Marbil apan sa pagkakaron kay wala pa silay nadawat nga gikan sa Department of Justice (DOJ).
Ang gitumong sa opisyal mao ang Custodial Center sa Camp Crame sa Quezon City diin kasagarang gitanggong ang mga high-profile personalities,diin ang bag-o lang mao si kanhi senador Leila de Lima kinsa naabsuwelto na sa kasong druga nga gipasaka batok kaniya sa administrasyong Duterte.
Hinuon si Marbil miingon nga ilang gitugyan na ngadto sa DOJ aron sa pagpahiluna sa mga plano kalabot sa pag-abot ni Teves sa nasod human kini gidakop sa kapulisan ug mga awtoridad sa Immigration sa Timor Leste diin ang kanhi solon midangop human giisyu ang warrant of arrest batok kaniya human siya gitumbok nga utok sa pagpatay kang Degamo.
Ug ang mapasalig sa PNP, mao ang detention facility ug bisan ang seguridad alang kang Teves kon ang DOJ mohangyo niini.
