CENTRAL VISAYAS-Nakighiusa ang Police Regional Office 7 sa gipatuman nga lakang ug deklarasyon ni Presidente Ferdinand Marcos Jr. nga total ban sa mga POGO sa nasud.
Diin gihatagan og katin-awan ni Police Lieutenant Colonel Gerard Pelare, ang tigpamaba sa PRO7, nga ang lima ka mga lisensiyado nga POGO nga ilang na-monitor sa milabay nga mga tuig kay dili na mga aktibo.
Bisan paman nga dili na kini aktibo, gisaad ni Pelare nga magpadayon gihapon ang monitoring sa kapulisan.
Dugang pa, giawhag ni Pelare ang mga katawhan nga kung adunay kasayuran sa bisan unsang operasyon sa POGO, i-report kini sa ilang mga opisina.
Hilabi na nga gituohan ni Pelare nga ang tanang operasyon kay “joint undertakings” tali sa gobyerno, komunidad, ug pwersa sa kapulisan.
Sa pikas bahin, nipasalig kini sa publiko nga ilang gisunod ang agresibo, tutok, analytical, ug human rights-adherent police operations.
Kini subay sa pamahayag ni Presidente Ferdinand Marcos Jr. atol sa iyang State of the Nation Address (SONA) nga nitumbok sa iyang administrasyon nga giduso sa wala’y dugo nga anti-drug operations.
Gitino niini, nga sa Central Visayas, ang kapolisan wala mogamit og extrajudicial nga pamaagi sa ilang mga operasyon.
Iyang gibutyag usab nga anaa sa 99% ang conviction rate sa mga kaso sa drugas sa rehiyon ug midugang nga ang ilang mga paningkamot sa pagpalig-on sa barangay drug clearing operations kay kasamtangang nakahawan na sa 71% sa 3,003 ka barangay sa tibuok Central Visayas gikan sa ilegal nga drugas.
