Gipahibalo sa Vatican nga nagpakita og ‘good response’ si Pope Francis sa iyang double pneumonia, ug ang iyang kahimtang anam-anam na og kaayo.
Ang 88-anyos nga Santo Papa nagpatambal sa Gemelli Hospital sa Roma sulod sa kapin tulo na ka semana, human nasuta nga adunay seryoso nga respiratory infection nga nagkinahanglan og padayon nga pagtambal.
Sumala sa pinakabag-o nga update gikan sa Vatican, ang kahimsog sa Santo Papa nagpabilin nga lig-on sa bag-ohay nga mga adlaw, nga nagpakita sa usa ka positibo nga tubag sa mga medical intervention.
Gihisgotan usab sa pamahayag nga walay hilanat ang Santo Papa ug nagpabiling maayo ang iyang blood test.
Namatikdan sa mga doktor ang hinay-hinay ug gamay nga pag-uswag ni Pope Francis apan nagpadayon ang ilang mabinantayon nga pagsusi ug naghatag sila og maampingon nga prognosis aron masiguro nga magpadayon ang pagkaayo sa Santo Papa.
Kalabot niini, padayon nga gihatagan og supplemental oxygen ang Santo Papa alang sa iyang pagginhawa. Sa adlaw, mogamit siya ug gamay nga tubo ilawom sa iyang ilong, samtang sa gabii mogamit kini og non-invasive mechanical ventilation samtang natulog.
Nasayran nga ang double pneumonia usa ka seryosong kondisyon nga makaapektar sa duha ka baga, hinungdan sa paghubag ug pilas nga maglisod sa pagginhawa sa tawo.
Samtang, hangtod karon wala pa gihapon makita sa publiko ang Santo Papa sukad sa iyang pagsulod sa tambalanan.
Bisan og wala isulti sa mga doktor kung unsa kadugay ang iyang pagpabilin sa ospital, ang usa ka eksperto nga wala kauban sa Santo Papa niingon nga tungod sa iyang edad ug kondisyon, lagmit magpadayon siya sa ospital aron matambalan.
Bisan pa sa sakit, ang Vatican karon nag-amping, pagkahuman sa duha nga mga insidente sa “acute respiratory insufficiency” nga nasinati sa Santo Papa kaniadtong Marso 3, nga nagpatunghag mga kabalaka bahin sa iyang kahimsog.
Sa laing dapit sa gawas sa tambalanan, nagtapok ang mga deboto nga Katoliko aron mag-ampo alang sa paspas nga pagkaayo sa Santo Papa, nagbutang ug mga kandila, rosaryo, ug uban pang mga halad sa tiilan sa estatwa ni anhing Pope John Paul II, nga kanunay usab nga gitambalan sa Gemelli Hospital sa iyang panahon.
