CENTRAL VISAYAS- Nasikop ang 353 ka mga indibidwal ug narekober ang P15.2 milyones nga kantidad sa ilegal nga droga sa tulo ka adlaw nga Simultaneous Anti-Criminality and Law Enforcement Operation (SACLEO) sa Police Regional Office 7 (PRO7) gikan Hulyo 28 hangtod 30.
Gipahigayon ang 163 ka drug operations nga misangpot sa pagkasikop sa 195 ka suspetsado.
Nasakmit ang 2,243.47 gramos nga gituohang shabu nga nagkantidad og P15.25 milyon ug marijuana nga nagkantidad og P4,600.
Sa kampanya batok ilegal nga sugal, 34 ka operasyon ang gihimo nga adunay 45 ka nadakpan, 68 ka gambling paraphernalia ang nakumpiska, ug P10,772 nga cash bets.
Sa operasyon batok loose firearms, 20 ang nadakpan, 42 ka armas ug 2 ka eksplosibo ang narecover. Gikonsiderar kini nga dakong lakang sa pagpugong sa kapintasan.
Samtang, adunay 93 ka wanted persons ang nadakpan, lakip ang 14 ka Most Wanted ug 79 ka Other Wanted Persons.
Gidayeg ni PRO7 Regional Director Police Brigadier General Redrico A. Maranan ang paningkamot sa tanang operatiba.
Misaad ang PRO7 sa padayon nga kampanya alang sa kalinaw ug seguridad sa Central Visayas.
